تعلم الألمانية مع أ/ أحمد شكري - تعلم الألمانية باحتراف

Lernmaterial

أهلا بيك في قسم المادة العلمية

انا هتكلم معاك هنا من واقع خبرتي في التدريس وبمنتهى البساطة وبدون أي تعقيد وبعيد حتى عن العربي الفصحى عشان تقدر تحقق هدفك من زيارة الصفحة دي على وجه التحديد!

إنت هنا عشان انت مش عارف تدرس من أي كتاب ومش عارف تحسن لغتك ازاي ومتلخبط ومحتاج مساعدة... وانا هنا هقولك انت محتاج ايه عشان توصل لإيه بإذن الله.

انا هتكلم على أشهر الكتب والمواد العلمية، لكن مش كلها... لأن فيه منها اللي انا توقفت عن العمل به من فترة طويلة، وفيه كتب مشتغلتش بيها أبداً... لو فيه عندك كتاب عايز تعرف عنه معلومات او كورس ما ابعتلي جزء منه (مش ربع صفحة، أكتر من صفحة عشان تقييمي يكون عادل) اشوفه وهقوللك رأيي.
تقدر تبعت استفسارك او طلبك مــن هنـــا!

ولكن أرجوك بلاش تطلب مني لينكات تحميل لان التحميل الغير قانوني ممنوع في أوروبا وعقوبته غرامات عالية جداً.

أولاً: الكورسات الأكاديمية

Menschen

ده كتاب من دار نشر Hueber الشهيرة والمعروفة بكتبها الرائعة، للأسف الشديد ان الكتاب أقل من التوقعات.

👌 مميزاته:

- دار نشر قوية وعندها خبرة في الكتب التعليمية والإمتحانات.

- حديث ومُستخدم في معهد جوتة مصر، وبالتالي يتيح إمكانية الدراسة بشكل متوافق مع جهة امتحانية معتمدة.

👎 عيوبه:

- غير منظم وتدريباته وأسلوبه غير ملائمين للكبار، حيث يعتمد طريقة تلقين تناسب الصغار بشكل أكبر.

- فيه مهارات تعليمية مؤجلة عن موعدها وآخرى قبل موعدها، ده سبب ابتعادنا عنه في دوراتنا الخاصة رغم ثقتنا في دار النشر المصدرة ليه.

Studio 21

كتاب من دار نشر Cornelsen والطبعة الأولى منه كانت في عام 2015، يعني جديد نسبياً.

👌 مميزاته:
- منظم بقدر كبير

- مضغوط ويوفر معاك وقت كبير في الدراسة
- كتاب واحد للدراسة والتدريبات

👎 عيوبه:
- تدريباته ضعيفة وفي حالات كتير مش كافية، يعني مدرسك او مدرستك لازم يساعد بتدريبات إضافية

- الطبعة الأولى كان فيها اخطاء، حاول تشتري الطبعة الثانية أو الأحدث

ده الكتاب اللي احنا شغالين بيه في دوراتنا الخاصة من A1 وحتى B1 ومحقق نجاح ونتائج جيدة جدا الحمد لله.

Spektrum

أحدث كتاب عملت منه، وهو الكتاب المستخدم في تعاوننا مع Globale Sprachen 3D في الوقت الحالي، وده كان أول استخدام لي للكتاب. لاحظت اختلاف كبير في طريقة سرد الدروس مقارنة بأي كتاب آخر، وبالتالي فيه قدر من الإبداع والتطور التعليمي.

👌 مميزاته:

- به نوعية جديدة من التدريبات، مثل تدريبات دمج الأفعال والأسماء لتكوين تعبيرات جاهزة والتركيز عليها لإكساب مهارات التحدث بسرعة.

- من ضمن التحديث في سرد الدروس هو إضافة ملف سماعي للنصوص المكتوبة أيضاً، و هو ما قد يغنيك عن مصادر أخرى للمسموع والمقروء مثل Graded German Readers، حيث يمكنك تحسين مهارة السماع والقراءة بهذا الشكل المبتكر أثناء دراسة الدرس العادي ايضاً.
- الكتاب حديث وكل المعلومات المتواجدة به عن الثقافة والسياسة والحياة في المانيا حديثة نسبياً.

- قام مؤلفي الكتاب بالتركيز بشكل كبير جداً على جزء الـ Lehrbuch على حساب الـ Arbeitsbuch، وهو ما أراه شيئاً إيجابياً، فأغلب الطلاب يتجاهل كتاب التدريبات من الأساس، وبالتالي كان توفير الجهد الخاص به أفضل.

👎 عيوبه:

- عند التعامل معه في البداية ستجده فوضوي قليلاً، فالدرس فيه لا ينقسم لـ Module، وبالتالي تتداخل معلومات الدروس مع بعضها البعض.

- شرح القواعد فيه ضعيف للأسف، في الأغلب ستحتاج لمصدر آخر لشرح النحو.

Lagune

ده أيضا كتاب من دار نشر Hueber وحرفياً هو أفضل كتاب اشتغلت منه في حياتي، وطبعاً بشهادة الكثير من الدارسين هو أفضل كتاب يقدر يستفيد الدارس منه.

👌 مميزاته:
- منظم لأبعد حد وبيستهدف كل مهارات اللغة
- تدريبات مكثفة على الثروة اللغوية والقواعد النحوية
- سهولة استهداف مهارة واحدة لتنميتها بدون الغرق في مواضيع كتير

👎 عيوبه:

- كبير جدا جدا جدا! محتاج وقت كبير عشان تنتهي منه مقارنة بأي كتاب آخر
- أخر طبعات منه أيضاً قديمة نسبياً.

Tangram

وده أيضا كتاب من دار نشر Hueber وكان كتاب رائع أيضاً وطريقة شرحه للقواعد والكلمات تخليك متذكرها لفترة طويلة...

👌 مميزاته:
- منظم ومرتب وخصوصاً من جهة المواضيع
- كان المنهج الأساسي في معهد جوتة مصر لفترة طويلة لجودته

- سابق نظرائه من الكتب الأخرى في المادة العلمية، يعني اللي خلص منه A2 بيكون في الحقيقة بجودة B1.1

👎 عيوبه:

- قديم جدا جدا وليس عندي علم لو فيه منه طبعات جديدة ام لا
- المادة العلمية غير مكثفة زي Lagune

Aspekte neu

كتاب من دار نشر Klett ورغم عدم استخدامي لكتب كتير من دار النشر دي، إلا أن الكتاب ده رائع بمعنى الكلمة وده سبب اننا قررنا نشتغل بيه في دورات الـ B2 بمجرد ما قمنا بالإطلاع عليه...

👌 مميزاته:
- مادة علمية مكثفة مستهدفة لمهارات الإمتحان من أول درس
- تدريبات مكثفة على الثروة اللغوية والقواعد النحوية
- كتاب التدريبات قد يغنيك عن الحاجة للتدرب على الإمتحان بشكل مستقل

- منظم جدا ومعروف كل شيء حدوده فين

👎 عيوبه:

- كبير جدا! محتاج وقت كبير عشان تنتهي منه
- محتاج إرشاد من مدرسك من حين لآخر للإستفادة الكاملة منه

ثانياً: القواميس
أ - القواميس الورقية

Arabisch Deutsch visuelles Wörterbuch

قاموس مصور رائع وهو نفسه اللي بنقوم بنشر صفحات منه على صفحتنا على الفيسبوك وبيوصلنا تعليقات إيجابية كتير بخصوصه وأسئلة عن اسمه...

👌 مميزاته:
- القاموس مقسم لمواضيع وكل موضوع تم تغطيته بشكل رائع وبأهم الكلمات التي تخص الموضوع
👎 عيوبه:

- لا يكفي وحده ولا يغني عن القاموس العادي

Langenscheidt - Universal-Wörterbuch

قاموس جميل وعملي جدا، فيه كل اللي تحتاجه من A1 وحتى B1، بعد كده وارد ان يواجهك كلمات مش فيه او المعنى مش هو المطلوب...

👌 مميزاته:
- سهل الإستخدام لأنه مش متوسع بشكل أكثر من اللازم
👎 عيوبه:

- لا يكفي بعد B2 ويجب إستخدام قاموس أكبر

Götz Schregle - Wörterbuch Arabisch-Deutsch

وحش القواميس! قاموس عملاق وترجمته رائعة ولكن!!! ليس لأي شخص قبل B2! هيكون تضييع وقت اكتر من استفادة!

👌 مميزاته:
- كبير جدا ويشمل تعبيرات كثيرة وثروة لغوية هائلة

- ترجمة معاني قريبة جداً من العربية الرسمية واللهجة المصري
👎 عيوبه:

- كبير جداً فننصح بإستخدامه فقط عند الحاجة

- طريقة بحث عن الكلمات قديمة بعض الشيء فسيحتاج الدارس أن يعتاد عليها أولاً

ب - القواميس الإلكترونية

dict.cc

حقيقي لا اجد وصف للقاموس الرائع ده! صدقني الكلمة اللي مش هتلاقيها في القاموس ده هي كلمة خاطئة!

👌 مميزاته:
- لم يمر علي في حياتي كلمة ليست به الا الكلمات المكتوبة بشكل خاطيء

- تقييم لدرجة شيوع الكلمات حتى لا يساء استخدامها

- تنبيه بجانب الكلمات لمعرفة في أي مجال يمكن استخدامها

- يدعم الجمع وجنس الكلمة والمرادفات الممكنة لكل معنى من معاني الكلمة
👎 عيوبه:

- لا يدعم اللغة العربية!

- نسخة الجوال بها امكانيات أقل من الموقع على الحاسب

لينك القاموس:

www.dict.cc

arabdict

قاموس رائع ومن افضل المشاريع اللي قام بيها العرب خلال القرون الأخيرة بصراحة...

👌 مميزاته:
- يدعم اللغة العربية

- تقييم لدرجة شيوع الكلمات حتى لا يساء استخدامها (بدأ مؤخراً وفي مرحلة التحسين)

- غالباً يوجد تنبيه بجانب الكلمات لمعرفة في أي مجال يمكن استخدامها

- يدعم الجمع وجنس الكلمة
👎 عيوبه:

- بعد الـ B1 ستحتاج بالتأكيد لقاموس آخر! ثروته اللغوية غير كبيرة!

- نسخة الجوال بها تحتاج انترنت وإعلاناتها مزعجة

لينك القاموس:

www.arabdict.com

Wiktionary

هنا يتوقف الكلام! لو انت في مستوى B2 أو أعلى ومن النوع الهاديء وبتحب البحث ومش مستعجل وحابب تفهم، أحب أهديك أفضل قاموس إحترافي ممكن تستخدمه في حياتك، مش دراستك بس...

👌 مميزاته:
- شرح مفصل لكل كلمة وأمثلة بمعاني مختلفة

- روابط لكلمات اخرى ذات علاقة وبيان شجرة أصل الكلمة

- شرح ألماني ألماني للكلمة وبالتالي أعلى دقة من إيضاح فروق الأفعال والكلمات

- يدعم الجمع وجنس الكلمة وتصريفات الأفعال
👎 عيوبه:

- ألماني ألماني، يعني أقل من B1 مستحيل يقدر يتعامل معاه

- حتى الآن لا يوجد نسخة معتمدة للجوال... كلها قواميس خارجية معتمدة عليه

- لا يدعم إظهار درجة شيوع الكلمة

لينك القاموس:

de.wiktionary.org

Google Übersetzer

وهنا برضه يتوقف الكلام، لأني مش عارف اقول ايه... ده قاموس شخص هيقضي فترة في المانيا وراجع، لا أنصح بيه أبداً لأي دارس...

👌 مميزاته:
- سريع وبيترجم نصوص بدقة تصل لـ 70%

- بيدعم لغات كتيرة جداً حتى الصعيدية والفيومية هتلاقيهم فيه

👎 عيوبه:

- عامل زي الجيوش العربية، مبيعرفش يقول لا! يعني لو مش قادر على الترجمة هيألف كلام من عنده ومؤكد ان الحرب العالمية الثالثة هتقوم بسبب سوء فهم منه

- طبعاً لا فيه تصريفات ولا صيغ جمع ولا درجة شيوع كلمات

- مفيش مرادفات ولا أصل الكلمة

- انخدع بيه ناس كتير وظنوا ان هيكل الجملة اللي بيظهرها صحيح واسسوا معلوماتهم بشكل خاطيء

لينك القاموس:

translate.google.com

ثالثاً: المواد العلمية المكملة

Pimsleur German

كورس رائع بصراحة وسهل جداً، الكورس قائم على الترديد... بتسمع متحدث بيتكلم بشكل واضح وبسيط وبعدين يديلك الفرصة تردد خلفه اللي قاله...

👌 مميزاته:

- المتحدثين للألمانية أصليين ونطقهم روعة

- الكورس مناسب لكل المستويات من الصفر حتى محادثة جيدة

- قائم على السماع بشكل أساسي وبالتالي مناسب للي بيسافر كتير

- تنظيم المادة العلمية والإحتياج ليها جيد جداً
👎 عيوبه:

- هو كورس محادثة فقط ولا يغني عن الكورس الأصلي

- لا يدعم العربية... فقط ألماني إنجليزي

Graded German Readers

أحد إبداعات دار النشر Klett... قصص وروايات مناسبة لمستويات مختلفة من A2 وحتى C1، مرفق مع الرواية الملف الصوتي الخاص بها. تسمع الكلام المكتوب مقروء وتستمتع بالقراءة معه...

👌 مميزاتها:

- المتحدثين للألمانية أصليين ونطقهم روعة

- أفضل طريقة لاكتساب لحن الكلام الألماني الذي يميز المتحدث الأصلي عن غيره

- أفضل طريقة لتحسين النطق والتخلص من مشاكله

- روايات شيقة وتستهدف الثروة اللغوية بكل جوانبها
👎 عيوبها:

- روايات من أجل تحسين اللغة فقط ولا تغني عن الكورس الأصلي

- لا يوجد ترجمة عربية ولا لأي لغة

الترجمة بين النظرية والتطبيق

بعد الله سبحانه وتعالى فالفضل قد يعود للكتاب ده من كتابة وإعداد الأستاذ الدكتور الفاضل رحمه الله، الدكتور محمد أحمد منصور، إني أصبحت مترجم! كل أسئلتي تقريباً في اللغة الألمانية وكيفية فهم معاني بعض الكلمات أو التعبيرات بأسهل شكل ممكن والمقابل العربي اللي ممكن يطرأ أثناء الترجمة تم إجابتها في الكتاب ده! خليني اديلك مثال واضح وصريح: معنى كلمة doch!! أكيد دي كانت او لا تزال مشكلة عندك... شرحها في أكثر من سياق في الكتاب الرائع ده...

👌 مميزاته:

- خبرة في إعداد الكتاب وإيصال المعلومة لا مثيل لها

- تقريباً لا يوجد سؤال وصلني خلال سنوات عملي كمدرس إلا وإجابته فيه

- غني بالأمثلة العملية الكثيرة

- يحتوي على قاموس للمصطلحات الإسلامية به أهم الألفاظ والتعبيرات
👎 عيوبه:

- يجب ان يكون مستواك اللغوي B2 على الأقل حتى تبدأ به

- غير مناسب لتعلم اللغة، بل لتكملة فهم افضل في اللغة

للأسف لم أعثر على رابط شراء له في ألمانيا!
أعتقد تقدر تلاقيه بسهولة في مصر مثلاً.

رابعاً: كتب شرح القواعد

Lehr- und Übungsbuch der deutschen Grammatik

وده أقدر أعتبره الكتاب اللي بدأ معايا مشوار التدريس... بيتم التدريس منه في كليات اللغات في مصر وبنستخدمه في دروس القواعد كتير وبستعرض صور منه أثناء المحاضرات لأنه ببساطة مدرس قواعد رائع معاك في أي وقت...

👌 مميزاته:

- شرح سلس وبسيط للقواعد بتدريبات كافية

- فيه ملاحظات على القواعد كتير من الدارسين والمدرسين بيدوروا عليها أو ميعرفوهاش أصلاً

- غني بالأمثلة العملية الواضحة والكثيرة

👎 عيوبه:

- أشهر نسخ الكتاب ألماني ألماني والنسخة الإنجليزية منه غير متواجدة بوفرة وبالتالي يحتاج لغة B1 على الأقل لفهمه

- غير مناسب لتعلم اللغة، بل لتكملة فهم افضل للنحو في اللغة

- ترتيب القواعد ليس بترتيب دراستها لغير الألمان... يعني مش نفس ترتيب الكورس الخاص بيك